அரச நியமனங்கள் வழங்கப்படாமை வேதனையளிக்கின்றது : கிளிநொச்சியில் தொடரும் போராட்டம்

தமக்கான வேலைவாய்ப்பினை பெற்றுத்தருமாறு கோரி கிளிநொச்சி வேலையற்ற பட்டதாரிகளால் கிளிநொச்சி மாவட்டசெயலகம் முன்பாக போராட்டம் ஒன்று முன்னெடுக்கப்பட்டுள்ளது.

இதன்போது ஜனாதிபதிக்கு கிடைக்கும் வகையில் மகஜர் ஒன்றும் மாவட்ட செயலகத்தில் கையளிக்கப்பட்டது.

குறித்த மகஜரில் குறிப்பிடப்பட்டுள்ளதாவது,

வடமாகாண வேலையற்ற பட்டதாரிகளாகிய நாம் இன்றுடன் 32 நாட்களாக யாழ். மாவட்ட செயலகம் முன்பாக அரச நியமனம் கோரி சாத்வீக வழியிலான கவனயீர்ப்பு போராட்டத்தில் ஈடுபட்டு வருவது யாவரும் அறிந்ததே.

எனினும் எமது இந்த கவனயீர்ப்பு போராட்டத்திற்கான எந்தவிதமான சாதகமான பதில்களும் உரிய தரப்புக்களிடம் இருந்து கிடைக்கப்பெறாமையானது மன வேதனையளிக்கின்றது.

கடந்த 27.02.2017 திங்கட்கிழமை ஆரம்பிக்கப்பட்ட எமது கவனயீர்ப்பு போராட்டத்தில் 31.03.2012 காலப்பகுதிக்கு பின் எமக்கான எந்தவிதமான அரச நியமனங்களும் வழங்கப்படாது புறக்கணிக்கப்பட்டு வருவதாக குறிப்பிட்டிருந்தோம்.

2015 ஆம் ஆண்டிலும் எமது கவனயீர்ப்பு போராட்டம் முன்னெடுக்கப்பட்டு வடமாகாண முதலமைச்சரால் வழங்கப்பட்ட வாக்குறுதியின் அடிப்படையில் கைவிடப்பட்டமை குறிப்பிடத்தக்கதாகும்.

அனைத்து பட்டதாரிகளுக்கும் அரச நியமனங்களை வழங்குக” எனும் கொள்கையின் அடிப்படையில் காலவரையறையற்ற போராட்டம் முன்னெடுக்கப்பட்டது.

எமது கவனயீர்ப்பு போராட்டத்தின் 11ஆவது நாள் (09.03.2017) வடமாகாணசபை அமைச்சர்களுக்கும், வடமாகாண வேலையற்ற பட்டதாரிகளுக்குமிடையிலான கலந்துரையாடலில், வடமாகாணத்திலுள்ள அரச வெற்றிடங்களில் பட்டதாரிகளை உள்ளீர்த்தல் வேண்டும் என குறிப்பிடப்பட்டது.

மேலும் பட்டதாரிகளின் பட்டச்சான்றிதழின் இறுதித் திகதியின் அடிப்படையில் உள்ளீர்த்தல் வேண்டும், தொண்டராசிரியர் நியமனத்திலுள்ள முறைகேடுகளை விசாரணை செய்து ஆரம்பப்பிரிவு ஆசிரியர் சேவைகளில் பட்டதாரிகளை உள்ளீர்த்துக் கொள்ள வேண்டும் எனவும் குறிப்பிடப்பட்டுள்ளது.

 

You might also like