வவுனியா கற்பகபுரம் கிராமத்திற்கு வழங்கப்பட்டுள்ள வீட்டுத்திட்டம் தொடர்பில் மக்கள் அதிருப்தி

வவுனியா கற்பகபுரம் கிராமத்திற்கு வழங்கப்பட்ட வீடமைப்பு அதிகார சபையின் வீட்டுத்திட்ட நடவடிக்கைகள் குறித்து அதிருப்தி அடைந்துள்ளதாக அப்பகுதி மக்கள் விசனம் வெளியிட்டுள்ளனர்.

இது குறித்து அந்த பிரதேசத்தைச் சேர்ந்த மக்கள் கருத்து தெரிவிக்கையில், “வவுனியா புதிய மற்றும் பழைய கற்பகபுரம் கிராமத்திற்கு 360 வீடுகள் வீடமைப்பு அதிகாரசபையால் வழங்கப்பட்டுள்ளது.

சுமார் 5 லட்சம் பெறுமதியான குறித்த வீட்டு கட்டுமானத்திற்குரிய பணம் கட்டம் கட்டமாக வழங்கப்பட்டு வருகிறது.

சீமெந்து, வீட்டுக் கூரை சீற் என்பன பொருட்களாக வீடமைப்பு அதிகாரசபையால் வழங்கப்படுவதுடன், அதற்குரிய பணத்தை கழித்து விட்டு மிகுதிப் பணத்தையே பயனாளிகளின் வங்கிக் கணக்குக்கு வைப்புச் செய்யப்பட்டுள்ளது.

இந்நிலையில், வீடு திருத்த வேலைக்காக வீடமைப்பு அதிகார சபையிடம் முன்னர் ஒரு லட்சம் ரூபாய் பணம் கடனடிப்படையில் மாதாந்தம் செலுத்தும் வகையில் பெற்றுக்கொள்ளப்பட்டது.

தற்போது வீட்டுத் திட்டத்திற்காக வழங்கப்படும் பணத்தில் குறித்த கடன் தொகை ஒரு லட்சத்தையும் அதற்குரிய வட்டியையும் வீடமைப்பு அதிகார சபையினர் கழித்து விட்டே மீதிப் பணத்தை வழங்குகின்றனர்.

இதனால் தமது வீடுகளை முழுமையாக பூர்த்தி செய்ய முடியாத நிலை ஏற்பட்டுள்ளது என குறித்த பிரதேச மக்கள் தெரிவித்துள்ளனர்.

தமக்கு வழங்கப்பட்ட கடனை இதில் கழிக்காது அவற்றை ஏற்கனவே கூறியபடி மாதாந்தம் அறவிடும்படியும் அம்மக்கள் கோரியுள்ளதுடன், இது தொடர்பில் தகவல் அறியும் உரிமைச் சட்டம் ஊடாகவும் வினவியுள்ளனர்.

இதனால் குறித்த அதிகாரிகள் தம்மை பழிவாங்குவதாக அப்பகுதி மக்கள் தெரிவித்துள்ளதுடன், தமக்காக கொண்டு வரப்பட்ட சீமெந்து உள்ளிட்ட பொருட்களையும் வழங்காது மீளத் திருப்பிக் கொண்டு சென்று விட்டதாகவும் கவலை தெரிவித்துள்ளனர்.

இது தொடர்பில் வவுனியா வீடமைப்பு அதிகார சபையின் முகாமையாளர் வி.எம்.வி.குரூஸ் கருத்துத் தெரிவித்த போது,

வீட்டு அறை கட்டுவதற்காகவே கடன் வழங்கப்பட்டது. தற்போது அவர்களுக்கு வீட்டுத்திட்டம் மானியமாக வழங்குவதால் அதில் அந்தப் பணத்தை கழித்து விட்டு மிகுதிப் பணத்தை வழங்கி அந்த வீடு பூர்த்தி செய்யப்படுகின்றது.

கடன் அவர்களின் விருப்பத்துடனேயே அறவிடப்படுகிறது. அவர்களால் அனுப்பப்பட்ட தகவல் அறியும் விண்ணப்பம் சனிக்கிழமையே கிடைத்தது. இன்னும் அதற்கு பதில் வழங்கவில்லை.

எமது அதிகாரிகள் மற்றும் உத்தியோகத்தர்கள் மிகவும் கஸ்டப்பட்டு அந்த மக்களுக்காக வேலை செய்கிறார்கள். எந்தப் பழிவாங்களும் இடம்பெறவில்லை. இன்றும் அவர்களுக்கு சீமெந்து வழங்கப்படுகின்றது.

தாம் சீராக வழங்குவதனாலேயே அவர்கள் வீடுகளை கட்டி வருகின்றனர் என அவர் மேலும் தெரிவித்திருந்தமை குறிப்பிடத்தக்கது.

You might also like