கௌதாரிமுனையில் யுத்தத்தால் மூடப்பட்ட பாடசாலையை மீள ஆரம்பிக்குமாறு கோரிக்கை

யுத்தத்தினால் அழிவடைந்து இதுவரை மீள ஆரம்பிக்கப்படாது காணப்படும் கிளிநொச்சி, பூநகரி கௌதாரிமுனை அரசினர் தமிழ் கலவன் பாடசாலையை மீள ஆரம்பிக்குமாறு மாணவர்களின் பெற்றோர் கோரிக்கை விடுத்துள்ளனர்.

80 வருடங்களுக்கும் அதிக பழமைவாய்ந்த கௌதாரிமுனை அ.த.க பாடசாலை, கடந்த 1991ஆம் ஆண்டு ஏற்பட்ட யுத்தம் காரணமாக மூடப்பட்டது. கடந்த 2010ஆம் ஆண்டு மக்கள் மீள்குடியேறி ஏழு ஆண்டுகளாகியும் பாடசாலை இதுவரை மீள ஆரம்பிக்கப்படவில்லை.

இப்பகுதியில் தற்போது 150 வரையான குடும்பங்கள் வாழ்ந்து வரும் நிலையில், இங்குள்ள பாடசாலை மாணவர்கள் அயல் கிராமத்தில் அமைந்துள்ள விநாசியோடை அ.த.க பாடசாலைக்கே செல்ல வேண்டிய நிலை காணப்படுகின்றது.

அத்துடன்,  கௌதாரிமுனை கிராமத்துக்கான போக்குவரத்து சேவை  இல்லாத நிலையில் இந்தப்பகுதிகளில் உள்ள மாணவர்கள் பல்வேறு சிரமங்களை எதிர்நோக்கி வருகின்றனர்.

தரம் 10 வரையான வகுப்புக்களை கொண்டு இயங்கிய இந்தப் பாடசாலையில் தரம் 5 வரையான வகுப்புக்களையாவது மீள ஆரம்பிக்குமாறு இப்பகுதி மக்கள் கோரிக்கை விடுத்துள்ளனர்.

You might also like