இறுதி கிரியையின் போது சடலத்தை எடுத்துச் சென்ற பொலிஸார்! யாழில் சம்பவம்

இறுதி கிரியையின் போது சடலத்தை எடுத்துச் சென்ற பொலிஸார்! யாழில் சம்பவம்

இறுதி கிரியைகள் செய்துகொண்டிருந்த போது, சடலத்தினை பொலிஸார் எடுத்து சென்ற சம்பவம் ஒன்று யாழ்ப்பாணம் நாவற்குழி பகுதியில் இடம்பெற்றுள்ளது.

விபத்து ஒன்றில் படுகாயமடைந்து, சிகிச்சை பெற்று வந்த நிலையில் உயிரிழந்த ஒருவரின் சடலமே இவ்வாறு இறுதி கிரியை நடைபெற்றுக்கொண்டிருந்த போது பொலிஸார் சடலத்தை எடுத்து வந்துள்ளர்.

இந்த சம்பவம் குறித்து மேலும் தெரியவருவதாவது,

“அப்பகுதியை சேர்ந்த பெரியான் நாகேந்திரம் (வயது 67) என்பவர் கடந்த 4 மாதங்களுக்கு முன்பு துவிச்சக்கர வண்டியில் செல்லும் போது, மோட்டார் சைக்கிள் மோதி விபத்துக்குள்ளானர்.

அதனையடுத்து வைத்திய சாலையில் அனுமதிக்கப்பட்டவருக்கு யாழ்.போதனா வைத்தியசாலை மற்றும் சாவகச்சேரி வைத்தியசாலைகளில் சிகிச்சையளிக்கப்பட்டது. கடந்த 4 மாத காலமாக படுக்கை நோயாளியாக அவர் சிகிச்சை பெற்றுவந்தார்.

இந்நிலையில். கடந்த செவ்வாய் கிழமை உறவினர்கள் வீட்டிற்கு அழைத்து சென்ற நிலையில் இரண்டு நாட்களின் பின்னர் கடந்த வியாழக்கிழமை வீட்டில் உயிரிழந்துள்ளார்.

அதனை அடுத்து மறுநாள் வெள்ளிக்கிழமை (நேற்றைய தினம்) இறுதி கிரியைகளுக்கு ஏற்பாடு செய்து இறுதி கிரியைகள் நடைபெற்றன.

அதனை அறிந்து குறித்த வீட்டிற்கு சென்ற சாவகச்சேரி பொலிஸார், விபத்து வழக்கு நீதிமன்றில் நிலுவையில் உள்ளது போது, தமக்கு அறிவிக்காது இறுதிகிரியைகளுக்கு ஏற்பாடு செய்த உறவினர்களை கடுமையாக எச்சரித்து, சடலத்தை மீட்டு பிரேத பரிசோதனைக்காக சாவகச்சேரி வைத்திய சாலையில் ஒப்படைத்தனர்.

அது தொடர்பில் சாவகச்சேரி நீதிமன்றிலும் அறிக்கை தாக்கல் செய்தனர். அறிக்கையை பார்வையிட்ட நீதிவான், பிரதேச திடீர் மரண விசாரணை அதிகாரி மூலம் விசாரணை நடத்தி, மன்றில் அறிக்கை சமர்ப்பிக்க பொலிஸாருக்கு உத்தரவிட்டார்.

அதனை தொடர்ந்து மரண விசாரணைகளை மேற்கொண்ட திடீர் மரண விசாரணை அதிகாரி உடற்கூற்று பரிசோதனையின் பின் சடலத்தை உறவினர்களிடம் ஒப்படைக்க பணித்தார்.

You might also like